प्रकास गुजराती - प्रकरण १७
मूंजा साथ सुहागी रे, हांणें अईं को न सुजाणो सिपरी । पेरोनी पांण न सुजातां, आइडा से वरी रे ॥१॥
सेई सजण सेई गालड्यूं, सेई कारयूं करीन । पांण जो काजे पिरी पांहिंजा, पाणी अखियें भरीन ॥२॥
सेई सिखामण डियन सिपरी, ताणीन घर मणे । पांण पाहियूं कीं ओसरूं, वलहो आव्यो वरी करे ॥३॥
कूकडियूं करीन पेहेलीनियूं, हांणें को न सुजाणो साथ । न तां खरे बपोरे सेज सोझरे, हाणे थींदी रात ॥४॥
पोए हथ हणंदा पटसे, हैडे डींदा घा । सजण सूरे में वेही न रेहेंदा, हल्ली वेदानी हथ मंझां ॥५॥
धाएडियुं करीन पिरी, परी परी चए वेण । पाणजे काजे पिरी बभेरां, पाण त्रेमाईन नेण ॥६॥
मायातां डिठियां मंझ पेहीने, सोझरे सिपरियन । भती भती जी रांद डेखारण, पिरी आंदो तारतम ॥७॥
जा माया आं मोंहें मंगई, सा डिठियां वी वार । साथ हाणें पिरी साथ हल्लजे, जीं पिरी पेराईन करार ॥८॥
वभेरे पिरी पाणजे काजे, सायर में विधाऊं आप । पाणजे काजे पांण विधाऊं, हाणें को न सुजाणो साथ ॥९॥
आकारतां अंई भले पसो था, पण पसो मंझियो तेज । पिरी पांहिंजा पाण पाणसे, घणूं करीन था हेज ॥१०॥
हांणें केही पर करियां आंसे, को न सुजाणों सेंण । सजण सेई पुकार करीन, आंके निद्र अचे कीं नेंण ॥११॥
नेंणेंनी मंझां निद्र न वंजे, जे हेडी मथां थेई । सेणेंसे अंई साथ न हल्यां, पोरयां कुरो कंदा रही ॥१२॥
हिन डुखे मंझा को न निकरयो, केहो डिसोथा भाल । जडे हली वेंदा हथ मंझां, तडे केहा थींदा हाल ॥१३॥
पाणके हिन पिरी धारा, वेओ चोय ईं केर । साथ संभारे न्हारयो दिलमें, जिन चुको हिन वेर ॥१४॥
हिकडी आर चुके मांहडू, तेके वी आर अचे बुध । हेतरा भठ वरंदे मथे, आंके अजां न वरे सुध ॥१५॥
हिक वेर म थीजा विसरया, हित न्हाय बेठे जो लाग । अंख उघाडे ढकजे, कोडमी पातीमें थिए अभाग ॥१६॥
आऊं खीजी आंके कीं चुआं, सा न वरे मूंजी जिभ । पण अंईं हिन माया मंझां, केही कढंदा निध ॥१७॥
वेण विगो आंके चुआं, सा वढियां मुंहजी जिभ । पण अंईं हिनमें पई रह्या, हिन मंझां कां न थिंदियां सिध ॥१८॥
हिन सोझरे जे न सुजातां, वभेरकां हीं ईं । पोए सांणेनी सिपरियन अग्यां, मोंह खणदियूं कीं ॥१९॥
पेरोनी पाण नजर न्हारींदे, व्यो अवसर हथां । जडे हथे मंझे हली वेयां, तडे केहेडी थेईनी पाण मथां ॥२०॥
हींय हंद एहेडो आय, हिक वेरमें थिए वेणां । साथ तां आईन सभे समझू, न्हाय केहे में मणां ॥२१॥
साथ अंईं कीं कीं न्हारयो संभारे, गुण म छडो मोकरे मोय । इंद्रावती चोय पेरे लगी, फिरी फिरीने केतरो चोय ॥२२॥
॥ प्रकरण ॥१७॥ चौपाई ॥३८०॥