गौरी- समझि बूझि गुरु कीजे
समझि बूझि गुरु कीजे, साधो भाई, समझि बूझि गुरु कीजे । यह तो सौदा परम अमोलक, निरखि परखि के लीजे ॥१॥
ज्ञान गम्भीर शील सन्तोषी, प्रेम अमृत मुख भाषे । अति निर्मल निजनाम सुनावे, जन्म मरण से राखे ॥२॥
धीरजवन्त धर्म प्रतिपालक, वेद लै भेद बतावे । आप तरे सिष्यन को तारे, बहुरि न भव जल आवे ॥३॥
खीर नीर को करे निवेरा, माया ब्रह्म चिन्हावे । जीव को आदि अंत बतलावे, अलख वस्तु लखावे ॥४॥
दूजी साखी कबीर की देवे, विध विध वाणी सुनावे । करके अर्थ बूझि जब देखो, तब संशय मिट जावे ॥५॥
यह तो बात प्रगट है साधो, शिव सुक मुनि श्रुति गाई । बिना सद्गुरु कोई पार न पावे, कोटि करे चतुराई ॥६॥
जो कोई खोज करे सद्गुरु की, सब्दै में लखि पावे । बिना विवेक वृथा पचि मरना, भरम में रैण दिन धावे ॥७॥
ता कारण यह सार सब्द पद, कहत मुकुन्द विचारी । हंसा होए सो सुन के बूझे, माने वचन हमारी ॥८॥